اٹاری گیمز کی کیسٹ 10 ہزار ڈالر میں فروخت۔۔۔۔۔ 1

اٹاری گیمز کی کیسٹ 10 ہزار ڈالر میں فروخت۔۔۔۔۔

(ویب ڈیسک): امریکہ میں فلاحی ادارے کے سستے اسٹور میں عطیہ کردہ اٹاری گیم کی کیسٹ نایاب ہونے کی بنا پر 10 ہزار ڈالر سے زائد قیمت میں فروخت ہوگئی۔
گڈوِل نارتھ سینٹرل ٹیکساس اسٹور میں سامان چھانٹنے والے ایک ملازم ایلیکس جوریز کاٹھ کباڑ سے اشیا الگ کررہے تھے تو ان کی نظرایک گیم ’ایئرریڈ‘ پر پڑی جو اٹاری 2600 کونسول میں لگنے والی ایک کیسٹ تھی۔ اسے یہ کیسٹ کچھ عجیب لگی کیونکہ عموماً پرانے گیم کی کیسٹ سیاہ رنگ کی ہوتی ہیں جن پر اسٹیکر لگا ہوتا ہے۔ تاہم ایئر ریڈ کا رنگ نیلا تھا اور اس پر ایک ہینڈل نما شکل بنی ہوئی تھی۔
ایلیکس نے اس کی تصویر اپنے والد کو بھیجی جو اٹاری گیمز کے بہت بڑے مداح اور کھلاڑٰی ہیں۔ ان کے والد نے جواباً بتایا کہ یہ ایک بہت نایاب گیم کی کیسٹ ہے۔ ایئر ریڈ 1982 میں ریلیز ہوا تھا جس میں ایئرشپ کنٹرول کرکے ایک شہر کو بچانا ہوتا ہے۔ اس کے مین اے ورژن کی صرف 13 کاپیاں ہی دنیا بھر میں موجود ہیں۔
گُڈوِل اسٹور نایاب، آثارِ قدیمہ اور دیگر قیمتی اشیا کو نیلام کرتا ہے جس سے زائد آمدنی حاصل ہوتی ہے جسے فلاحی امور میں استعمال کیا جاتا ہے۔ بسا اوقات ویڈیو گیمزیا کیسٹ کو ایک بنڈل کی صورت میں بیچا جاتا ہے لیکن ایئر ریڈ کو بہت اہتمام سے الگ کرکے ایک ہفتے کی نیلامی کےلیے پیش کیا گیا۔ اسے 10 جون کو فروخت کے لیے پیش کیا گیا۔ بولی 500 ڈالر سے شروع ہوئی اور پہلے دن 1000 ڈالر تک پہنچی۔ ایک ہفتے بعد اس کی بولی 10,590 ڈالر تک جاپہنچی۔
خیال تھا کہ زیادہ سے زیادہ یہ تین ہزار ڈالر میں فروخت ہوجائے گا، لیکن اس اندازے سے بھی ساڑھے تین گنا زائد قیمت تک جا پہنچا۔ اس سے قبل 2011 میں اس کی ایک کاپی 3500 ڈالر میں فروخت ہوئی تھی۔ اس رقم سے ٹیکساس میں رہنے والے 20 بے گھر افراد کی مدد کی جائے گی۔

Leave a Reply