اسلام آباد(ویب ڈیسک): ملک بھر میں کورونا وائرس کا غلبہ، لاک ڈاؤن کے باوجود مریضوں کی تعداد میں مسلسل اضافہ انتہائی تشویشناک صورتحال پیدا کر رہا ہے۔ تازہ ترین اعدادوشمار کے مطابق مصدقہ مریضوں کی تعداد 5496 ہوگئی اور 93 افراد جاں بحق ہوگئے۔
وفاقی وزارت صحت کے کمانڈ اینڈ کنٹرول سینٹر کے اعداد و شمار کے مطابق ملک میں گزشتہ 24 گھنٹوں کے دوران 3233 مشتبہ مریضوں کے ٹیسٹ کیے گئے جن میں سے 119 میں اس وائرس کی تشخیص ہوئی۔
اس طرح ملک بھر میں کورونا کا شکار افراد کی تعداد 5496 ہوگئی جب کہ کورونا وائرس کے 197 مریض صحت یاب ہوچکے ہیں۔ اب تک مجموعی طور پر 65114 مریضوں کے ٹیسٹ کیے گئے ہیں۔
کمانڈ اینڈ کنٹرول سینٹر کے مطابق گزشتہ 24 گھنٹوں کے دوران ملک بھر میں 7 افراد اس وائرس کے ہاتھوں جان کی بازی ہار گئے جب کہ 44 کی حالت تشویش ناک ہے۔
حکام کے مطابق پنجاب میں 2672، سندھ 1452، بلوچستان 230، خیبر پختونخوا میں 744، آزاد کشمیر 40، اسلام آباد میں 131 اور گلگت بلتستان میں 224 کیسز رپورٹ ہوچکے ہیں۔
