مقبوضہ کشمیرسے آسام اور اس سے آگے کی صورتحال بھارت کے خاتمہ کی شروعات ہے: میجر جنرل آصف غفور

(نیٹ نیوز)پاک فوج کے ترجمان میجر جنرل آصف غفور نے مقبوضہ کشمیر اور مودی سرکار کے متنازع شہریت بل کے حوالے سے چلنے والے جھوٹے بھارتی اکاؤنٹس پر ردعمل دیتے ہوئے کہا ہے ایسی جھوٹی چالیں ہندوتواکے خلاف مقبوضہ کشمیر اور بھارت میں ہونے والے طاقتور عوامی مظاہروں کو نہیں روک سکتیں،مقبوضہ کشمیر سے آسام اور آگے تک، یہ بھارت کے خاتمہ کی شروعات ہے ،یہ حقیقی سرجیکل سٹرائیک ہے جس کے بارے میں دنیا جانتی ہے ، جھوٹے فلیگ آپریشن اور سرجیکل سٹرائیک پہلے ہی جھوٹی ثابت ہو چکی، سچ ہمیشہ قائم رہتا ہے ۔ پاک فوج کے ترجمان نے اپنے ذاتی اکائونٹ پر #IndiatoEndia کے ہیش ٹیگ سے ٹویٹس میں مقبوضہ کشمیر اور بھارت میں مودی سرکار کے اقدامات پر تنقید کی۔میجر جنرل آصف غفور نے لکھا آج بھارت کی تمام اقلیتیں دوبارہ ضرور یہ جان چکی ہونگی کہ ہمارے قائد اعظم محمد علی جناح ؒکی ہندو توا کے بارے میں سوچ بالکل درست تھی،انہیں اب بدصورت بھارت کا حصہ بننے پر یقینی طور پر افسوس ہو رہا ہوگا۔انہوں نے انڈیا کو اینڈیا کا ہیش ٹیگ بھی دیا۔واضح رہے بھارت نے 5 اگست کو مقبوضہ کشمیر کی آئینی حیثیت سے متعلق آئین کا آرٹیکل 370 اور 35 اے ختم کر کے مقبوضہ کشمیر اور لداخ کو غیر قانونی طریقے سے بھارتی یونین میں شامل کر لیا تھا،ان جبری اقدامات کے خلاف بڑے پیمانے پر عوامی ردعمل کے خوف سے بھارت نے مقبوضہ کشمیر میں 5 اگست سے کرفیو نافذ کر رکھا ہے تاہم لاکھوں کی تعداد میں فوج تعینات ہونے کے باوجود مقبوضہ وادی میں آئے روز مودی سرکار کے خلاف بڑے پیمانے پر مظاہرے کئے جا رہے ہیں۔بھارتی ہندو انتہا پسندمودی حکومت کے وزیر داخلہ امیت شاہ نے 9 دسمبر کو لوک سبھا میں بھارتی شہریت سے متعلق متنازع بل پیش کیا جس کے تحت بنگلادیش، پاکستان اور افغانستان سے آنے والے غیر مسلم تارکین وطن کو شہریت دی جائے گی لیکن مسلمانوں کو شہریت نہیں دی جائے گی۔متنازع بل کو راجیہ سبھا (بھارتی پارلیمنٹ کا ایوان بالا) نے بھی 11 دسمبر کو منظور کر لیا تھا اور پھر 14 دسمبر کو بھارتی صدر راج ناتھ کووند کی منظوری کے بعد یہ بل باقاعدہ قانون بن چکا ہے جس کے خلاف بھارت میں بڑے پیمانے پر احتجاج ہو رہا ہے اور آسام اور مدھیہ پردیش سمیت 6 ریاستوں نے اس قانون کو لاگو کرنے سے انکار کر دیا ہے ۔