(ویب ڈیسک): صدیوں بعد آج رات سیارہ مشتری اور زحل کا ملاپ ہوگا اور اس انوکھے و نایاب نظارے کو پاکستان سمیت دنیا بھر میں دیکھا جاسکے گا۔
تفصیلات کے مطابق قدرت نے خلائی سفر کے بغیر سیاروں کی سیر کا موقع فراہم کردیا، آج رات دو سیاروں کا بغیر دوربین کے نظارہ کیا جاسکے گا۔
سیاروں کا سفر کرنے کے شوقین افراد کے لیے انسٹیٹیوٹ آف اسپیس سائنس اینڈ ٹیکنالوجی کی جانب سے بتایا گیا کہ مشتری اور زحل آج رات دو سیاروں کا جوڑے کے طور پر نظر آئیں گے۔ یہ انوکھا اور نایاب نظارہ سورج غروب ہونے کے بعد آج رات دیکھا جاسکے گا۔
ماہرین کا کہنا ہے کہ دونوں سیارے آخری بار 5 مارچ 1226 کو اتنے قریب آئے تھے۔
ماہرین کے مطابق نایاب نظارہ کراچی یونیورسٹی کی آبزرورٹری میں بھی دیکھا جاسکے گا اور سورج غروب ہونے کے بعد ایک گھنٹے تک یہ منظر دیکھا جاسکے گا۔
