(ویب ڈیسک): سرکاری افسران کےعوامی شکایات کو بروقت حل نہ کرنے پر وزیر اعظم کا نوٹس، غیر سنجیدہ اور موثر کارکردگی نہ دکھانے والے سرکاری افسران کے خلاف ایکشن لے لیا گیا۔
چیف سیکریٹری پنجاب نے ماتحت 1586 افسران کے ڈیش بورڈ کی جانچ پڑتال مکمل کر لی ہے۔ وزیراعظم کو پیش کردہ رپورٹ کے مطابق 263 افسران کو کارکردگی کی بنیاد پر وارننگ، 7 سرکاری افسروں کو شوکاز نوٹس اور 833 افسروں کو محتاط رہنے کی ہدایت جبکہ 111 افسروں سے وضاحت طلب کی گئی ہے۔ وزیراعظم آفس کے مطابق 403 سرکاری افسروں کی کارکردگی کو سراہا گیا ہے۔ سیکرٹری اطلاعات، زراعت، ایکسائز اور سیکرٹری آبپاشی کو کارکردگی بہتر کرنے کا مراسلہ جاری کیا گیا ہے۔
وزیراعظم عمران خان نے کابینہ اجلاس کے دوران سرکاری افسران کی ناقص کارکردگی کا نوٹس لیا تھا۔ وفاقی وزراء نے بھی بیوروکریسی کے غیر سنجیدہ رویے کی شکایت کی تھی۔ ڈپٹی کمشنر لاہور، گجرات، شیخو پورہ سمیت پنجاب کے 20 ڈپٹی کمشنرز کو مراسلے جاری کردیا گیا ہے۔ مراسلے میں تمام افسروں کو کہا گیا ہے کہ عوام کو بہتر سہولیات کی فراہمی کے لیے کارکردگی کو بہتر کریں۔
اسسٹنٹ کمشنر رائیونڈ، لیہ، جھنگ ، بُورےوالا، صادق آباد، ننکانہ صاحب، پنڈی گھیب سمیت 43 اسسٹنٹ کمشنرز کو شوکاز نوٹس جاری کیے گئے ہیں۔ وارننگ لیٹر جاری کرنے کا مقصد تمام افسران کو تنبیہ کرنا ہے، وزیراعظم کے ویژن کے مطابق عوام کو سہولیات مہیا کرنے کے لیے اقدامات کئے جارہے ہیں۔
